ვიკიმედია საქართველო/შეთანხმება არასრულწლოვანთა მონაწილეობის შესახებ
ზოგადი დებულება
მიმდინარე შეთანხმება არეგულირებს და ა(ა)იპ ვიკიმედიის მომხმარებელთა საქართველო ჯგუფსა (შემდეგში „ვიკიმედია საქართველო“ ან „ორგანიზაცია“) და მის პროექტებსა და პროგრამებში მონაწილე არასრულწლოვანი პირის ურთიერთობას, სადაც არასრულწლოვანს პირს წარმოადგენს მისი კანონიერი მეურვე ან/და ერთ-ერთი მშობელი.
ამ შეთანხმების ძალით, კანონის წინაშე არასრულწლოვანი პირის კანონიერი მეურვე/მშობელი სრულად პასუხისმგებელია არასრულწლოვანი პირის ქმედებებსა და მის პასუხისმგებლობაზე.
მიმდინარე შეთანხმება ადგენს მხარეთა პასუხისმგებლობასა და ვალდებულებას, ასევე კონფლიქტის მოგვარების გზებს. მხარეები შესაბამისი შეთანხმების ფორმის ხელმოწერით იღებენ ვალდებულებას დაიცვან მიმდინარე შეთანხმება სრულად და უპირობოდ.
მხარეები
მიმდინარე შეთანხმების მხარეებს წარმოადგენენ, ერთის მხრივ, ა(ა)იპ ვიკიმედიის მომხმარებელთა საქართველოს ჯგუფი (ს/კ: 400272110, მის.: საქართველო, ქალაქი თბილისი, თეიმურაზ ბოჭორიშვილის ქუჩა, N 15, სადარბაზო 4, სართული 7, ბინა N 219, ბლოკი B) და მეორე მხრივ, შესაბამისი ხელმოწერილი შეთანხმების ფორმის მიხედვით არასრულწლოვანი პირის კანონიერი მეურვე ან/და ერთ-ერთი მშობელი.
შეთანხმების საგანი
არასრულწლოვანი პირის კანონიერი მეურვე ან/და ერთ-ერთი მშობელი აძლევს თანხმობას არასრულწლოვანს მონაწილეობა მიიღოს ვიკიმედია საქართველოს მიერ ორგანიზებულ ან თანაორგანიზებულ პროექტებში, ღონისძიებებსა და აქტივობებში, მათ შორის, მაგრამ არა მხოლოდ:
ა) ვიკიმედიის პროექტებთან დაკავშირებულ საგანმანათლებლო შეხვედრებში, ტრენინგებსა და ვორკშოპებში;
ბ) რედაქტირების მარათონებში, კონკურსებსა და კამპანიებში;
გ) საველე გასვლებში, ფოტოგადაღებებში, კულტურულ-საგანმანათლებლო ტურებში;
დ) სასწავლო ბანაკებში (ვიკიბანაკი);
ე) რეგიონალურ და საერთაშორისო კონფერენციებში;
ვ) სხვა მსგავს საგანმანათლებლო, კულტურულ, მოხალისეობრივ ან საზოგადოებრივ პროექტებში.
კონკრეტული პროექტის, ღონისძიების ან ბანაკის დეტალები შეიძლება განისაზღვროს ამ შეთანხმების საფუძველზე ცალკე მომზადებული თანხმობის ფორმით, სადაც მიმდინარე შეთანხმება წარმოადგენს თანხმობის განუყოფელ ნაწილს.
მხარეთა ვალდებულებები
ვიკიმედია საქართველო, თავისი შესაძლებლობების ფარგლებში ვალდებულია:
- უზრუნველყოს პროექტის/ღონისძიების/ბანაკის მიზნების, ძირითადი წესების, ადგილისა და დროის შესახებ ინფორმაციის მიწოდება კანონიერ წარმომადგენელთან გონივრულ ვადაში.
- მიიღოს გონივრული ზომები არასრულწლოვნის უსაფრთხოების, ღირსების, პირადი სივრცისა და კეთილდღეობის დასაცავად.
- უზრუნველყოს მონაწილეთა ქცევის წესების, უსაფრთხოების ინსტრუქციებისა და პასუხისმგებელი პირების საკონტაქტო ინფორმაციის ხელმისაწვდომობა.
- დაუყოვნებლივ დაუკავშირდეს კანონიერ წარმომადგენელს/მეურვეს/მშობელს მნიშვნელოვანი ინციდენტის, ქცევის წესების დარღვევის, ჯანმრთელობის პრობლემის, უსაფრთხოების შემთხვევის ან არასრულწლოვნის მიერ ღონისძიების დატოვების საჭიროების შემთხვევაში.
- საჭიროების შემთხვევაში, არასრულწლოვანს გაუწიოს პირველადი დახმარების ორგანიზება და, გადაუდებელ შემთხვევაში, მიმართოს შესაბამის სამედიცინო დაწესებულებას ან სასწრაფო დახმარებას.
- დაიცვას მონაწილეთა პერსონალური მონაცემები და გამოიყენოს ისინი მხოლოდ ღონისძიების ორგანიზების, უსაფრთხოების, ანგარიშგების, კომუნიკაციისა და კანონით გათვალისწინებული მიზნებისთვის.
არასრულწლოვანი პირის კანონიერი წარმომადგენელი/მეურვე ან/და ერთ-ერთი მშობელი ვალდებულია:
- დაადასტუროს, რომ არის არასრულწლოვანი მონაწილის მშობელი ან კანონიერი მეურვე და უფლებამოსილია მისცეს თანხმობა არასრულწლოვნის მონაწილეობაზე ვიკიმედია საქართველოს პროექტებში, ღონისძიებებსა და ბანაკში.
- ვიკიმედია საქართველოს მიაწოდოს სრული, სწორი და განახლებული ინფორმაცია არასრულწლოვნის შესახებ, მათ შორის: სახელი, გვარი, ასაკი, საკონტაქტო მონაცემები, ჯანმრთელობის მდგომარეობა, ალერგიები, კვებითი შეზღუდვები, მედიკამენტების საჭიროება და სხვა ისეთი გარემოებები, რომლებიც შეიძლება მნიშვნელოვანი იყოს არასრულწლოვნის უსაფრთხოებისა და სათანადო მონაწილეობისათვის.
- დაუყოვნებლივ აცნობოს ვიკიმედია საქართველოს, თუ შეიცვლება არასრულწლოვნის ჯანმრთელობის მდგომარეობა, საკონტაქტო ინფორმაცია ან სხვა არსებითი გარემოება, რომელსაც შეიძლება გავლენა ჰქონდეს არასრულწლოვნის მონაწილეობაზე.
- მოთხოვნის შემთხვევაში დროულად წარადგინოს არასრულწლოვნის მონაწილეობისათვის საჭირო დოკუმენტები, მათ შორის პირადობის დამადასტურებელი დოკუმენტის ასლი, დაბადების მოწმობა, ჯანმრთელობის შესახებ ინფორმაცია, სამედიცინო დაზღვევის მონაცემები, ნებართვა ტრანსპორტირებაზე ან სხვა აუცილებელი დოკუმენტაცია.
- წინასწარ გააცნოს არასრულწლოვანს პროექტის, ღონისძიების ან ბანაკის ძირითადი წესები, ქცევის სტანდარტები, უსაფრთხოების მოთხოვნები.
- ხელი შეუწყოს არასრულწლოვნის მიერ ვიკიმედია საქართველოს, ბანაკის, მასპინძელი სივრცისა და ვიკიმედიის პროექტების შესაბამისი წესების დაცვას, მათ შორის სხვა მონაწილეების პატივისცემას, უსაფრთხო კომუნიკაციასა და დისკრიმინაციული, შეურაცხმყოფელი ან საფრთხის შემცველი ქცევის დაუშვებლობას.
- უზრუნველყოს არასრულწლოვნის დროული გამოცხადება შეთანხმებულ შეკრების ადგილზე და, საჭიროების შემთხვევაში, მისი დროული წაყვანა ღონისძიების, პროექტის ან ბანაკის დასრულების შემდეგ, ან ვიკიმედია საქართველოს მოთხოვნის საფუძველზე ნებისმიერ დროს.
- პროექტის, ღონისძიების ან ბანაკის მიმდინარეობისას იყოს ხელმისაწვდომი მის მიერ მითითებულ საკონტაქტო ნომერზე ან უზრუნველყოს ალტერნატიული საკონტაქტო პირის ხელმისაწვდომობა გადაუდებელი შემთხვევისათვის.
- ჯანმრთელობის, უსაფრთხოების ან სხვა გადაუდებელი შემთხვევის დროს ითანამშრომლოს ვიკიმედია საქართველოს პასუხისმგებელ პირებთან და დროულად მიიღოს საჭირო გადაწყვეტილებები არასრულწლოვნის ინტერესებიდან გამომდინარე.
- თუ არასრულწლოვანს სჭირდება მედიკამენტის მიღება, წინასწარ წერილობით მიაწოდოს ვიკიმედია საქართველოს მედიკამენტის დასახელება, დოზა, მიღების დრო, შენახვის წესი და სხვა აუცილებელი ინსტრუქცია. კანონიერი წარმომადგენელი პასუხისმგებელია მიწოდებული სამედიცინო ინფორმაციის სისწორეზე.
- უზრუნველყოს, რომ არასრულწლოვანმა ღონისძიებაზე ან ბანაკში არ მიიტანოს ალკოჰოლი, თამბაქო, ნარკოტიკული ან ფსიქოტროპული ნივთიერებები, იარაღი, საშიში საგნები ან სხვა ისეთი ნივთები, რომლებიც აკრძალულია კანონით, ბანაკის წესებით ან საფრთხეს უქმნის მონაწილეებს.
- უზრუნველყოს არასრულწლოვნისათვის საჭირო პირადი ნივთების, ტანსაცმლის, ჰიგიენის საშუალებების, მედიკამენტების და სხვა აუცილებელი ნივთების მომზადება.
- თუ არასრულწლოვანი ვეღარ შეძლებს მონაწილეობას პროექტში, ღონისძიებაში ან ბანაკში, ამის შესახებ დროულად აცნობოს ვიკიმედია საქართველოს, რათა ორგანიზაციამ შეძლოს მონაწილეთა სიის, ტრანსპორტირების, განთავსების, კვებისა და სხვა საორგანიზაციო საკითხების გადაგეგმვა.
- თუ არასრულწლოვნის მონაწილეობა შეწყდება ჯანმრთელობის მდგომარეობის, წესების არსებითი დარღვევის, უსაფრთხოების საჭიროების ან სხვა საფუძვლიანი მიზეზის გამო, კანონიერი წარმომადგენელი ვალდებულია ორგანიზაციასთან შეთანხმებით უზრუნველყოს არასრულწლოვნის დროული და უსაფრთხო წაყვანა ღონისძიების ჩატარების ადგილიდან.
- თუ არასრულწლოვანი განზრახ ან უხეში დაუდევრობით დააზიანებს ვიკიმედია საქართველოს, მასპინძელი ორგანიზაციის ან მესამე პირის ქონებას, ზიანის ანაზღაურების საკითხი გადაწყდება მხარეთა შეთანხმებით ან საქართველოს მოქმედი კანონმდებლობის შესაბამისად.
- გაეცნოს და საჭიროების შემთხვევაში დაადასტუროს თანხმობა არასრულწლოვნის პერსონალური მონაცემების დამუშავებაზე იმ ფარგლებში, რაც აუცილებელია მონაწილეობის რეგისტრაციის, ღონისძიების ორგანიზების, უსაფრთხოების, კომუნიკაციის, ანგარიშგებისა და კანონით გათვალისწინებული ვალდებულებების შესასრულებლად.
- დააფიქსიროს თანხმობა ან უარი არასრულწლოვნის ამოცნობადი ფოტო, ვიდეო ან აუდიომასალის გამოყენებასა და გამოქვეყნებაზე, მათ შორის ვიკიმედია საქართველოს ვებ-გვერდზე, სოციალურ ქსელებში, პრეზენტაციებში ან ვიკიმედიის პლატფორმებზე.
- აცნობიერებდეს, რომ ვიკიმედიის ონლაინ პროექტებში მონაწილეობა შეიძლება გულისხმობდეს საჯარო პლატფორმებზე მუშაობას, სადაც მომხმარებლის სახელი, რედაქტირების ისტორია, ატვირთული მასალა ან სხვა საჯარო აქტივობა შესაძლოა ხელმისაწვდომი იყოს ინტერნეტში.
- აცნობიერებდეს, რომ ვიკიმედიის პროექტებში განთავსებული მასალა, მათ შორის ტექსტი, ფოტო ან სხვა კონტენტი, შეიძლება გამოქვეყნდეს თავისუფალი/ღია ლიცენზიით, რაც იძლევა მისი გამოყენების, გავრცელებისა და გადამუშავების შესაძლებლობას შესაბამისი ლიცენზიის პირობების დაცვით.
- ითანამშრომლოს ვიკიმედია საქართველოს წარმომადგენლებთან ყველა იმ საკითხზე, რომელიც უკავშირდება არასრულწლოვნის უსაფრთხოებას, კეთილდღეობას, მონაწილეობას, ქცევის წესების დაცვას და ღონისძიების შეუფერხებელ ჩატარებას.
მხარეთა პასუხისმგებლობა
მხარეები პასუხისმგებელნი არიან ამ შეთანხმებით ნაკისრი ვალდებულებების კეთილსინდისიერად, სრულად და დროულად შესრულებაზე საქართველოს მოქმედი კანონმდებლობისა და ამ შეთანხმების პირობების შესაბამისად.
ვიკიმედია საქართველოს პასუხიმგებლობაა:
- ორგანიზაცია პასუხისმგებელია პროექტის, ღონისძიების ან ბანაკის გონივრულად ორგანიზებაზე, მონაწილეთათვის წინასწარ განსაზღვრული წესების გაცნობაზე, უსაფრთხოების ძირითადი პირობების უზრუნველყოფასა და არასრულწლოვანი მონაწილის კეთილდღეობის დასაცავად გონივრული ზომების მიღებაზე.
- ორგანიზაცია ვალდებულია მიიღოს გონივრული და პროპორციული ზომები არასრულწლოვანი მონაწილის უსაფრთხოების დასაცავად, მათ შორის უზრუნველყოს პასუხისმგებელი პირების არსებობა, საჭირო საკონტაქტო ინფორმაციის ხელმისაწვდომობა და გადაუდებელ შემთხვევებში შესაბამისი რეაგირება.
- ორგანიზაცია პასუხს აგებს იმ ზიანზე, რომელიც გამოწვეულია მისი, მისი უფლებამოსილი წარმომადგენლის ან მის მიერ დაქირავებული/ჩართული პირის განზრახი ან გაუფრთხილებელი ქმედებით ან უმოქმედობით, თუ ასეთი პასუხისმგებლობა დადგენილია საქართველოს მოქმედი კანონმდებლობით.
- ჯანმრთელობის მდგომარეობასთან ან უბედურ შემთხვევასთან დაკავშირებულ სიტუაციაში ორგანიზაცია ვალდებულია იმოქმედოს არასრულწლოვნის საუკეთესო ინტერესებიდან გამომდინარე, დაუკავშირდეს კანონიერ წარმომადგენელს და, საჭიროების შემთხვევაში, უზრუნველყოს პირველადი დახმარების ორგანიზება ან შესაბამისი სამედიცინო დახმარების გამოძახება. ორგანიზაცია არ არის პასუხისმგებელი იმ სამედიცინო შედეგებზე, რომლებიც გამოწვეულია მისთვის წინასწარ უცნობი ჯანმრთელობის მდგომარეობით, ალერგიით, დაავადებით ან სხვა გარემოებით, თუ აღნიშნული ინფორმაცია კანონიერ წარმომადგენელს არ მიუწოდებია.
- თუ ღონისძიება ან ბანაკი მოიცავს ორგანიზებულ ტრანსპორტირებას, ვიკიმედია საქართველო იღებს ვალდებულებას გამოიყენოს გონივრულად შერჩეული სატრანსპორტო მომსახურება. ტრანსპორტირებისას მონაწილე ვალდებულია დაიცვას უსაფრთხოების წესები და პასუხისმგებელი პირების მითითებები. ტრანსპორტირების დროს მესამე პირის ან გადამზიდავის ქმედებით გამოწვეული ზიანის საკითხი გადაწყდება მოქმედი კანონმდებლობისა და შესაბამისი მომსახურების პირობების მიხედვით.
- ვიკიმედია საქართველო არ არის პასუხისმგებელი მესამე პირების, სხვა მონაწილეების ან გარე მომსახურების მიმწოდებლების ქმედებებით გამოწვეულ ზიანზე, თუ ორგანიზაციამ მიიღო გონივრული ზომები ასეთი რისკის თავიდან ასაცილებლად ან შესამცირებლად და ზიანი არ არის გამოწვეული ორგანიზაციის ბრალით.
- კანონიერი წარმომადგენელი აცნობიერებს, რომ ვიკიმედიის ონლაინ პროექტებში მონაწილეობა შეიძლება გულისხმობდეს საჯარო პლატფორმებზე მუშაობას. ვიკიმედია საქართველო არ არის პასუხისმგებელი იმ შედეგებზე, რომლებიც უკავშირდება არასრულწლოვნის მიერ საკუთარი ნებით საჯაროდ გამოქვეყნებულ ინფორმაციას, მომხმარებლის სახელით განხორციელებულ აქტივობას ან მესამე პირების მიერ საჯარო მასალის შემდგომ გამოყენებას, გარდა იმ შემთხვევისა, როდესაც ზიანი გამოწვეულია ორგანიზაციის ბრალეული ქმედებით.
- თუ კანონიერმა წარმომადგენელმა მისცა თანხმობა არასრულწლოვნის ფოტო/ვიდეომასალის გამოყენებაზე ან ვიკიმედიის პლატფორმებზე ღია ლიცენზიით გამოქვეყნებაზე, იგი აცნობიერებს, რომ ასეთი მასალის შემდგომი გავრცელების, ჩამოტვირთვის ან მესამე პირების მიერ გამოყენების სრული კონტროლი შესაძლოა შეუძლებელი იყოს. ვიკიმედია საქართველო პასუხისმგებელია მხოლოდ მასალის თავდაპირველ გამოყენებაზე ამ შეთანხმებითა და მიცემული თანხმობის ფარგლებში.
- ვიკიმედია საქართველო პასუხისმგებელია არასრულწლოვნისა და კანონიერი წარმომადგენლის პერსონალური მონაცემების დამუშავებაზე მხოლოდ იმ მიზნებითა და ფარგლებში, რომლებიც გათვალისწინებულია ამ შეთანხმებით, შესაბამისი თანხმობითა და მოქმედი კანონმდებლობით. კანონიერი წარმომადგენელი პასუხისმგებელია ორგანიზაციისთვის მიწოდებული მონაცემების სისწორეზე.
- ვიკიმედია საქართველო არ არის პასუხისმგებელი იმ შედეგებზე, რომლებიც გამოწვეულია არასრულწლოვნის მონაწილეობის შეწყვეტით, თუ შეწყვეტა მოხდა უსაფრთხოების, ჯანმრთელობის დაცვის, წესების არსებითი დარღვევის ან სხვა საფუძვლიანი მიზეზის გამო.
არასრულწლოვანი პირის კანონიერი წარმომადგენლის/მეურვის ან/და ერთ-ერთი მშობლის პასუხიმგებლობაა:
- კანონიერი წარმომადგენელი პასუხისმგებელია ვიკიმედია საქართველოსთვის მიწოდებული ინფორმაციის სისწორეზე, სისრულესა და დროულ განახლებაზე, მათ შორის არასრულწლოვნის ჯანმრთელობის მდგომარეობის, ალერგიების, მედიკამენტების, კვებითი შეზღუდვების, ქცევითი ან სხვა მნიშვნელოვანი საჭიროებების შესახებ.
- თუ არასრულწლოვნის ჯანმრთელობის, უსაფრთხოების ან მონაწილეობისათვის მნიშვნელოვანი ინფორმაცია არასწორად, არასრულად ან დაგვიანებით იქნა მიწოდებული, ამით გამოწვეულ შედეგებზე პასუხისმგებლობა ეკისრება კანონიერ წარმომადგენელს, საქართველოს მოქმედი კანონმდებლობის ფარგლებში.
- კანონიერი წარმომადგენელი ვალდებულია წინასწარ გააცნოს არასრულწლოვანს ღონისძიების, პროექტის ან ბანაკის წესები და ხელი შეუწყოს მათ დაცვას. არასრულწლოვნის მიერ წესების არსებითი დარღვევის შემთხვევაში ვიკიმედია საქართველოს უფლება აქვს მიიღოს შესაბამისი ზომები, მათ შორის შეზღუდოს ან შეწყვიტოს არასრულწლოვნის მონაწილეობა და მოსთხოვოს კანონიერ წარმომადგენელს არასრულწლოვნის წაყვანა ან დაბრუნების ორგანიზებაში მონაწილეობა.
- თუ არასრულწლოვანი განზრახ ან უხეში გაუფრთხილებლობით დააზიანებს ვიკიმედია საქართველოს, მასპინძელი ორგანიზაციის, სხვა მონაწილის ან მესამე პირის ქონებას, ზიანის ანაზღაურება ეკისრება არასრულწლოვნის კანონიერ წარმომადგენელს.
- არასრულწლოვნის პირადი ნივთების შენახვაზე, მოვლასა და გამოყენებაზე პასუხისმგებლობა ეკისრება თავად მონაწილესა და მის კანონიერ წარმომადგენელს, გარდა იმ შემთხვევისა, როდესაც ნივთის დაკარგვა, დაზიანება ან განადგურება გამოწვეულია ვიკიმედია საქართველოს ან მისი უფლებამოსილი პირის ბრალეული ქმედებით.
მხარეთა საერთო პასუხისმგებლობაა:
- თითოეული მხარე პასუხისმგებელია იმ ხარჯებზე, რომლებიც ამ შეთანხმებით ან მხარეთა დამატებითი შეთანხმებით მასზეა დაკისრებული. თუ არასრულწლოვნის მონაწილეობა შეწყდება წესების დარღვევის, ჯანმრთელობის მდგომარეობის ან კანონიერი წარმომადგენლის მოთხოვნის საფუძველზე, დაბრუნებასთან, წაყვანასთან ან სხვა დამატებით ხარჯებთან დაკავშირებული საკითხი გადაწყდება მხარეთა შეთანხმებით ან წინასწარ დადგენილი პირობების შესაბამისად.
- არცერთი მხარე არ აგებს პასუხს ვალდებულებების შეუსრულებლობაზე ან დაგვიანებით შესრულებაზე, თუ ეს გამოწვეულია დაუძლეველი ძალის გარემოებით, მათ შორის სტიქიური უბედურებით, ეპიდემიით, ომით, არეულობით, ტრანსპორტირების შეზღუდვით, სახელმწიფო ორგანოს გადაწყვეტილებით ან სხვა ისეთი გარემოებით, რომელიც მხარის კონტროლს არ ექვემდებარება.
დავების გადაწყვეტა
მხარეები ეცდებიან ნებისმიერი უთანხმოება გადაწყვიტონ მოლაპარაკების გზით.
შეთანხმების განმარტებასა და შესრულებასთან დაკავშირებული დავა გადაწყდება საქართველოს მოქმედი კანონმდებლობის შესაბამისად.
თუ მოლაპარაკება შედეგს არ გამოიღებს, დავა განსახილველად გადაეცემა უფლებამოსილ სასამართლოს, თუ მხარეები სხვა წესზე წერილობით არ შეთანხმდებიან.
დასკვნითი დებულებები
კანონიერი წარმომადგენელი ადასტურებს, რომ გაეცნო ამ შეთანხმებას, ესმის მისი შინაარსი და ხელს აწერს ნებაყოფლობით.
ამ შეთანხმების ნებისმიერი ცვლილება ძალაშია მხოლოდ წერილობითი ფორმით, თუ კანონით სხვა რამ არ არის გათვალისწინებული.
შეთანხმება უნივერსალურია და მასზე დათანხმება ხდება შესაბამისი ცალკე ნებართვის ფორმით, რომელსაც ხელს აწერს ორივე მხარე.
 |